من الذاكـــرة الجزء..9..

مساء الفل البارح لما كنا معزومين عند سعاد ، قالت لي ام محمد انها اليوم جايه عندي تفطر ..
لذلك حالة استنفار كانت في البيت .. قالت المحروسة بنتي ليه ياامي احنا داخلين على حرب ؟ قلتلها نعم وجود ام محمد اليوم على سفرتي في المغرب يطلب مننا حالة استنفار ... المهم المغرب قرب وسامعه الباب بيدق تعالو معايا نشوف مين ...
*** ياهلا ولله باام محمد خالتي العزيزه ، اتفضلي حبيبتي البيت نور بوجودك ياخاله
@ اهلاً فطوووم .
*** خذي يابنت السفره افرشيهاوقربيها من ام محمد
@ عدلي يابنت السفره شوفي كيف معروجه صلحيها من هناك
ليلى : شوووفي ياامي ايش تقول الخاله اني مااعرف افرش سفره
تركي : امي الحرمه دي من قلها تجي عندنا .. شوفي تقلي غير فلم الكرتون وحط الحرم دحين مغرب خلاص . مابدي عندها الراديو تفك الحرم
**** : خلاااااص انت وهي اخرجوا من المطبخ ماني عارفه اقلي السنبوسك ... ولا خليني اعطيها التمره عشان تفك ريقها ..
@ : هاتي عنك يافطوووم صحن التمره ... بس بدي اقلك حاجة يافطوووم بس لا تزعلي مني
***: لا قولي اصلاً ماعندي وقت حتى ازعل فيه
@ : شوفي فطوم نحن كنا لما نقدم التمره نعتني بيها مانحطها بهذا الشكل .. يعني مثلاً نحمص اللوز الحجازي ونحطه جوة التمره والله يافطوم تاكلي ماتشبعي ..
وبعدين السنبوسك اسمحيلي يافطوم اني اقلك القلي المصبوط مو كده ، الظاهر كده الزيت كان حار مره وحمش عليكي ..
هاتي بس كاسة مويه ابلع بيها
*** :خذي ياخاله المويه باالعافيه على قلبك
@ : ليه المويه كده يافطوم انتي ماتبخريها ، آآه منكم يابنات الأيام دي ، فين كنا نحن نولع الفحم ونحط عليه المستكة ونبخر الشراب والزير وبعدين تشربي مويه ماتشبعي
****: طيب سمي بالرحمن ومدي يدك وكلي فول ترى يجنن لا يفوتك
@ : شيلي ياشيخة ، فين صحن الفول الي اطبخه في البيت واقطع عليه البصل وبعدين اجيب السمن البلدي واحطه على وجه الفول وتكون الجمره مولعه احطها عليه واغطيه شويه ، الله يافطوووم تشمي ريحته من آخر الشارع
****: صادقه ياخاله ومن غير ماتحلفي بس خليني ساكته وكاتمه في قلبي ، منك لله يايشخة كان جبتي معاكي حاجة وحده بس جايه وايدك فاضيه ومو عاجبك العجب ولا الصيام في رجب

@: انتي بتبربري مع نفسك ايش بتقولي يافطوووم
***: لا مافي شيء ، بس نسيت اقول لابو تركي يجبلنا شاهي معاه حتى نعناع مافي خلص

@: لا دحين ماابغا شاهي اعطيني بس المخده خليني انسدح شويه ، ولما اقوم نتعشىا يافطوووم

**** نتعشىا... دحين مو قالت اكلي مو طيب كمان تبغاني احطلها عشا
تركي : انا مااحب الخاله طفشتني ياامي
ليلى : ايش هذا نظام البيت كله اليوم انخرب ، خليها ياامي تروح تنام في غرفتك راح يفوتني المسلسل

( اماانا اقلكم اليوم مافي حكايه ... لا تقولو طيب لما تقوم من النوم والله انا تعبانه وماني قادره أوقف على رجولي )