من الذاكـــرة الجزء..8..

اليوم السهره في بيت سعاد بس كيف اروح وايدي فاضية لازم اعملها شيء معايا
المهم جاء على بالي اعملها صينية كنافة بالجبنة وعندي فضلت خيركم فطاير زادت من الفطور آخذتها معايا ..
********************************^
وصلت بيت سعاد وكنت آخر وحدة توصل ، لقيت المجلس حقها مليان حريم وكل اثنين قاعدين يتكلموا مع بعض مثلاً عندنا خديجة ومريم حاطين روسهم في بعض والله اعلم عمان يحشو في مين ...
وعندنا كمان : عديله وجواهر قاعدين يضحكوا بشويش ماادري على مين ، بس مايكون عليا ربنا يستر
واما جميلة وعيشة ، دول الأثنين قدرتهم على الله ، حازو على المرتبة الأولى في الحش في خلق الله ، تعالو نشوف ايش كانو يقولو ..

جميله : سمعتي ياعيشة الي انا سمعته ؟
عيشه : معقوله توصلك اخبار قبلي لا ماسمعت قولي
جميله : ياحبيبتي يقولو ام محمد قووويه مره عشان كده المسكينه مرة محمد ماقدرت تعيش معاها
عيشة : بعيد عنك الغيره قاتلتها من مرة ولدها
جميله اي والله وشوفي الحربايه قدام اهل الحاره تتمسكن حتى اتمكنت من قلوبهم وصارو يحنو عليها
عيشه : بس اسمعي بدي اقلك شيء
جميله : قولي خير في ايه كمان
عيشه : ترى انتبهي من فطوووم ترى حاطة راسها في راس ام محمد وكل يوم وهما عند بعض ..
جميله : خلاص اسكتي شوفي ام محمد وصلت
************************************************
ودخلت ام محمد واول وحده قامت وسلمت عليها هي جميله وبعدها عيشه وهات يااحضان وبوس على الراس .... قالت عيشه والله لكي وحشه ياخالتي ام محمد ، لسة دوبي عمان اقول لجميله الحاره من غيرك ظلام ...
ام محمد : الله يسلمكم يارب
**********************************
انا ماقدرت استحمل هذا الوضع من النفاق والحش آخذت ام محمد على جنب وقلتلها : طمنيني عنك كيفك دحين ؟
قالت عيشة ل جميله شفتي كيف حطت فطوم راسها في راس ام محمد ياترى ايش عمان تقلها

المهم قلت لأم محمد الله يخليكي كملي وبعدين لما نمتي في غرفتك في بيت ولدك ايش صار بعد كده ؟
@ طول الليل يافطوم وانا اتقلب في ديك الغرفه الي كأنها زنزانه في سجن ، ماصدقت وشفت الصبح طلع رحت جري على المطبخ وقلت اسوي خير فيهم واعملهم الفطور لأنهم عرسان .. لكن ندمت اني عملت كده .
**** ليه ياخالتي خير اتكلمي
@ قامت من النوم مرة محمد وشافتني جهزت الفطور ، احمر وجهها من الغضب وقالت البيت هذا بيتي انا.. وانتي مكانك هناك في الحاره بس انا جبتك وعطفت عليكي عشان خاطر محمد وبس .. لو سمحتي روحي غرفتك الين نخلص فطورنا انا ومحمد بعدين تجي ترفعي المطبخ وتاكلي الي يبقى مننا سمعتي ولا اعيد تاني ..
**** وسمعتي كلامها ياخالتي
@ لا ، قبل ماتغلق كلامها صحي محمد من النوم وقال ليه حبيبتي صوتك عالي عسى محد سوالك شيء ... قالت : لا حبيبي بس شوف امك كيف تتعب نفسها معانا المفروض انا الي اخدمها واجبلها فطورها الين حدها ...
***** وبعدين ياخالتي
لكن في هذه اللحظة دخلت سعاد وقالت اتفضلوا العشا جاهز

قمنا للعشا وقلت لا تخافي ياام محمد الدنيا دواره وبكره تشوفي ان شاءالله ايش راح يصير فيها ...