من الذاكـــرة الجزء..7..

مساء الورد جبت السلم عشان اطلع عليه واغير اللمبه الي انحرقت ، صح في تانيه مولعه لكن ماتعطي نور كفايه ، ومالحقت اطلع إلا والباب يدق .. ورحت افتح الباب ..
*** اهلاً ام محمد فينك ياشيخة والله وحشتيني
--- كيفك فطوم ؟
*** الحمدلله اتفضلي الله والنبي يحيكي ياخالتي ام محمد
--- وه يافطوم ليه السلم كده في وسط المجلس ؟
*** سلامتك مافي شيء بس بدي اغير اللمبه انحرقت
--- بس في وحده تانيه مولعه
*** بالله تسمي دي مولعه شوفي كيف ضعيفه
--- ياشيخة احمدي ربك اجل اش تقولي لو كنتي عشتي حياتنا من اول ، من يوم يقرب المغرب نروح ننزل الفوانيس ونمسحها ونعبيها كاز ونولعها وكل يوم على هذا الحال ... خلاص تعالي فطوم نجلس ،
قوليلي فطوم اليوم سويتي شربه ؟
*** سويت بس دقيقة اشيل السلم من هنا واغرفلك شربه وسنبوسك كمان
اتفضلي ام محمد الشربه
--- دحين دي الي قدامي شربه
*** اجل ايه ياخالتي ؟
--- ياحبيبتي دي موية زير مو شربه فين الحب ماني شايفته ؟
*** إذا مو عاجبتك لا تشربيها، ولا اقلك هاتيها ومن غير مطرود والقصة خلاص خديجة تحكيلي هي ..
--- طبعاً خديجة لإنها تحشر نفسها في كل شيء ( خشوني لا تنسوني ولعو الشمعه وشوفوني ) دي خديجة من يوم اعرفها
*** ياريت جات بس على خديجة إلا في كمان ناس تانية هرجت وقالت ولدك غضيب وخساره فيه اسم محمد ، كان سمته فريد كان احسن
--- . شوفي فطوم ( انا ادعي على ولدي واكره الي يقول آآآمين ) هاتي عبايتي وبيتك هذا راح ارش عليه رماد ، ان كان يوم دعسته ..
*** ياشيخه صلي على النبي حصل خير اللهم يخزيك ياشيطان
--- اللهم صلى عليك يانبي
**** ادخلي ياخالتي وهاتي راسك اسلم عليها .. تعالي نجلس ونحكي عن فريد اقصد محمد سامحيني نسيت والله .... الله يسامحك يلي في بالي
___ الله يسامح الجميع .. خلاص رايحة البيت اسمحيلي فطوم
*** لا حبيبتي هو دخول الحمام زي الخروج منه .. اجلسي واحكي ليله ومحسوبه علينا
--- طيب فطوم ...
محمد بعد مااتزوج طلب مني اني اروح اعيش معاه واخذني بالقوة من بيتي وقلي هناك غرفتك جهزتها لكِ المدام ، قلت طيب ورحت وطبعاً مرته لمن شافتني شمقت وقلبت وجهها فيا بس لمن محمد طالع فيها ضحكتلي وقالت يامرحبا ياخالتي ان ماشالتك الأرض تشيلك عيوني ، واخذتني وورتني غرفتي

**** اكيد غرفه جميله وعلى مستوى
--- الغرفه يافطوم كان فيها حنبل وليانه اسفنج ومخده على الأرض وبس .. لكن يافطوم اعذريني مااقدر اكمل اليوم الباقي صعب والله
*** ياقلبي ياخالتي لا تبكي ترا قطعتي قلبي ... خلاص انتظرك بكره
___ طيب بس بكره الهرجة عند سعاد عزمتنا كلنا
*** ان شاءالله ربنا معاكِ

وخرجت من عندي وانا اقول ياترى ايش عملت فيها مرة ولدها اكثر من كده ، يلا بكره نشوفها عند سعاد بس ان شاءالله تجيب معاها صحن من طبيخها .. راح يغلق رمضان وانا مادقته ...