من الذاكـــرة الجزء..4..

اليوم تمنية ايام راحت من رمضان وانا كل يوم ادخل المطبخ على شوربه وسنبوسك طفشت مافي تغيير .. وام محمد عليها طبخ يجنن لكن الزين عمره مايكمل ، كل ماارسلها صحن مليان سنبوسك على امل انها تغرفلي طبخة من عندها في صحني لكن يرجعلي الصحن مليان فصفص ولوز تكروني محمص يلا مومشكله نعمة كريم اهو ينفع في سهرات رمضان ، اليوم عملت لقيمات وفي ناس تقول لقمة القاضي المهم مليت لأم محمد صحن وإخذته ورحت عندها ..

دقيت الباب عليها وبشويش كمان لكن من يوم فتحت الباب قالت : احد يدق الباب بهذا الشكل ماتعرفي اني يادوب اقوم من الأرض ، ادخلي بس وايش هذا الي في ايدك ؟
قلتلها : جبتلك لقيمات معايا ، قالت وه ياندامة لساعك واقفة على الباب ، تعالي ساعديني في تقطيف المولوخية اشتهيتها في السحور مع الرز الأبيض قلت الحمدلله ماراح يرجع صحني فاضي لكن ردت بسرعة وقالت ( قالو عند الغوله عرس قلت يدوب يكفيها ويكفي عيالها ) قلت في نفسي مافي فايده الفصفص واللوز نعمه ..
طيب ام محمد واحنا عمان نقطف المولوخية نكمل قصتك ايش حصل بعدين ..
قالت : لما عرف محمد اني اغسل هدوم الجيران زعل كثيير وجلس يبكي ويقول امي تشتغل خدامة عند الناس ..
قلتله ياولدي ياحبيبي انا ماني خدامة انا بس اساعدهم وهما كمان يساعدونا اجل كيف تبغا تتعلم اجبلك مصروف مدرسة ولبس من فين ابوك ماتركلنا ولا قرش ..

*** هااا وبعدين
ولا قبلين ياعيني ، رحت للجيران التانين وقلتلهم ان كان عندهم عزيمة وضيوف كثير ترى انا طباخة اسطى

*** قلت في قلبي آآه ياام محمد نفسي ادوق اكلك قبل مايخلص الشهر الكريم مافي حل غير اني اطرد التكرونية حقة الفصفص من الحاره ....
كملي ياخالتي وبعدين

وبعدين ياحبيبتي القرش صار يجري في يديننا ودخلت محمد احسن مدرسة وصرفت عليه الين مااتخرج من الثانويه وصار رجال ملو هدومو ...
لكن بعدين جاني بهرجة جديده ... قال ايه يبغا يسافر يدرس برا
*** طيب وانتي وافقتي ياخاله على طلبه ؟
قالت : قومي خلاص خليني اقفل وراكي الباب عشان بدي اصلي الوتر وانام شويه الين يجي ميغاد السحور ..

خرجت من عندها وريحة المولوخية في خشمي ، الله يسامحها ..