من الذاكــــرة الجزء ..6..

اليوم عشرة ايام راحت من رمضان وعلى قول ام محمد إذا عشر بشر ، وربي يتمُ علينا واحنا بصحة وعافية ويتقبلو مننا
المهم قلبي حاسس انه اليوم في احد راح يجيني وزي ماقالت ام محمد ( كنس بيتك وقشه ماتدري مين يخشه ) عشان كده لازم اشد حيلي على البيت اليوم وانظفه ههه سامعه الباب يدق ياترى مين الي جاني من بدري كده ..

*** مين بيدق على الباب
@ هادِ انا افتحي يافطوووم بسرعه الصحن حرق ايدي
*** تقولي الصحن حرق ايدك واخيراً يافطووووم جاكي صحن من الجيران ..بس مايكون فيه فصفص او صابون ...
@ ياساتر ساعة عشان تفتحي الباب تقولي ماشيه على قشر بيض وخايفه لا يتكسر
*** يامرحبا ب خديجة نورتي ياختي اتفضلي وليه هذا التعب هاتي من يدك آآآه على الريحه تعالي ياام محمد وشوفي خديجة ايش جابت معاها ...
@ إلا صحيح ايش اخبار ام محمد والله اني زعلانه عليها يافطووووم
*** ليه خير ان شاءالله صارلها شيء لا سمح الله
@ لا الشر برا وبعيد عنها
*** اتكلمي اجل بسرعه اشبها
@ ياشيخه بعد محمد ماطلق مرته وهي حالتها مقلوبه
*** ايش تقولي هيا بالله تسكتي وماتحرقي علينا الحكايه احنا لسه في البدايه ..دحين تلاقي العيون انفتحت ويبغوا يعرفوا بقية كلامك
@ من هما دول يافطوووم
*** ناس ماتعرفيهم 😀
المهم خدوج انتي تعرفي اكيد قصة ام محمد كلها ، وشكلها اليوم ماراح تجي وانا بصراحة مافيه اروح لها .. ياختي بس بدي اعرف بعد محمد مارجع من السفر كيف كان اتغير ولا لا ؟

@ آآآه يافطوم ، رجع محمد من السفر واحد تاني ماتقولي هذا الولد الي اتربى في الحاره والي امه هادِ الأنسانه الطيبه ... ياستي بعد مااستلم وظيفته استأجر لأمه بيت جديد وحرمها من الحاره وحكم عليها تقاطع الجيران ..
وبعدين طلب من امه انه يتزوج لكن على شرط موهي الي تخطبله عن طريقها .. راح هو مع اصحابه خطب واتزوج من غير امه ماتعرف لأنه بعيد عنك مايتشرف بيها قدام نسايبه يخاف لا تفضحه عشنها من الحاره ويخاف لا تعزم اهل الحاره وتخجله بيهم ..

**** يااااه ياخديجة صدق المثل الي يقول ( قله شرفني قله حتى يموت الي يعرفني )