من الذاكـــرة الجزء الآخيـــر ..17..





اليوم اهل الحاره كلهم معزومين عند سعاد عشان فرح ساره على محمد وعشان الوقت قصير بين الفطور والسحور ،
كانت سعاد تبغا تسوي لساره ليلة الحنه وزفة الخريط لكن الوقت مايسمح بهذا كله ، واخذنا ساره عند زينب عشان تعملها الازم ، وبعد صلاة التراويح خلصت ساره ورجعت ومعاها زينب ، لكن تبارك الرحمن ساوه تقول للقمر قوم وانا اجي محلك .
ورحنا وجبنا الدفوف وانشدنا اناشيد اسلاميه خاصه بالعروسين ، وجاء وقت الزفه ودخل محمد وماسك في يده ساره كانو الأثنين حلوين ويجننوا .
ام محمد طبعاً الفرحه مش سايعاها وصارت دموعوها تنزل ومحمد يمسح دموعها ويسلم على راسها ويقلها راح اعوضك عن الماضي المؤلم الي سببتلك هو .
لكن قلب الخاله الطيب حضن محمد بكل حنان .. وبصراحه دمعت عيوننا كلنا، لكن غيرنا الموضوع ب الأناشيد الجميله ، حتى صار وقت السحور ، اتسحرنا وخلص الفرح واخذ محمد عروسته وامه وراحوا بيتهم .. وكلنا رجعنا لبيوتنا ...
بعدي يومين عزمتنا ام محمد على العشا عندها احتفالاً بعروس محمد .. وطبعاً ماني مصدقه نفسي اني اخيراً راح اذوق اكل ام محمد .
بعد العشا جلست جنب ام محمد وقلتلها : بشري ياخاله كيف العروسه ؟؟
قالت : الله يحميها يافطوووم من العين .. شالتني جوة عيونها وقالت ان امها وصتها وقالتلها الأول خالتك وبعدين محمد .. والله يافطوووم ماتخليني ادخل المطبخ ولا اشتغل في البيت .. وانا اقلها يابنتي لساعك عروسه ، تقول لا ياخالتي انتي تعبتي كثير ولازم ترتاحي .. قلت ربي يسلم امك الي ربتك هذه التربيه ..
الحمدلله يافطوووم قلبي ارتاح وانا ماني عارفه كيف اشكرك لأنك انتي كنتِ السبب في هذا الزواج المبارك ..
قلتلها لا تشكريني ياخالتي .. الطيبون للطيبات
وفين ياخاله راح تقضوا العيد ؟
قالت في المدينه المنوره .. نفسها من زمان تروح مع محمد ومرته .. لكن اتحققت الأمنيه وراح ان شاءالله تروح معاهم ،
قرب الفجر ، اخذت عبايتي وقلت لإم محمد ، كل سنه وانتي طيبه العيد قرب . يادوب تعبي عشان سفركم ، لكن ياام محمد . بعد تجربتك الأولى والثانيه مع حريم محمد . ايش تنصحي الشباب الي بدهم يتزوجوا قالت : انصحهم قبل مايسألو عن البنت اول مره يسألو عن الأم لأنها هي تزرع وبنتها تحصد الي زرعته فيها امها ... وعندك ساره اكبر مثال ..
صدقتي ياخاله ..
ورجعت البيت والفجر يأذن وابو تركي في المسجد ومعاه تركي ..
صليت ودخلت غرفتي خلاص نوم لأن العطش بدأ معايا ، وبعد لحظات رجع ابو تركي وجلسنا نتكلم شويه عن العرس .. لكن ابو تركي سرحان ، وسألته ليه سرحان وياريتني ماسألته ؟؟
قال : يابخته محمد اليوم اتخليت نفسي مكانه ولا ايش رأيك فطوم انفع عريس ...
انا لما سمعت كده كتمت غيظي في قلبي ولا كنت راح اكسر كل الي على التسريحة على دماغه لكن قلت خليني انا احسن منه وبس قلتله كلمه وحده وهي ( شوف يارائد إذا كان انت تنفع عريس انا كمان الف واحد يتمناني .. وبس رائد سمع هذه الكلمه راح في خبر كان ..
( ورجعت ريما لعادتها القديمة ) واخذت مخدتي ورحت انام مع ليلى .. لازم يعرف اني بشر ولي طاقه محدوده على التحمل .. اعتقد انا كده مااخطأت ....
( وادرك شهريار الصباح وسكت عن الكلام المباح ) استودعكم الله وكل عام وانتم بخير

لنا لقاء بإذن الله في عمل جديد ولكم مني احتراماتي وتقديري لمتابعتكم الجميله


تعليقات

المشاركات الشائعة