من الذاكـــرة الجز.. 10..

بعد صلاة العشا والتراويح ، جاء ابو تركي وجاب معاه الشاهي والنعناع ، وصحيت ام محمد من النوم ..
واجتمعنا كلنا مع بعض عشان نشرب الشاهي
قال : ابوتركي فين محمد ياخالة مااشوفه هادِ الإيام ؟؟
انا قاطعت ابو تركي وقلتلها ، شوفي ياخاله ام محمد اليوم كملي قصة محمد ولا تردي على احد وبس ماقلت شيء تاني ... ماشفت غير ابو تركي يصرخ في وجهي ويقول تاني مره لما اتكلم مع ام محمد انتِ بالذات ماتدخلي بيننا لا تحشري نفسك في كل شيء ..وانطبق البيت صريخ بيننا ، ماني مصدقة انه هذا زوجي ابو تركي عمره ماعملها معايا وقدام الأغراب .... لكن قلت يافطوم لازم تعرفي السبب وسألته
وقلت انت ياابو تركي دقت اكل ام محمد ولا لا ؟
قال إلا عزمني قبل يومين محمد عندهم .. لكن الله يافطوووم ايش اكل في حياتي مادقت زيه .
قلت : اهااا خلاص ياابوتركي المثل يقول ( إذا عرف السبب بطل العجب ) وقلب الرجل في معدته .. انا مالي شغل هذا كلام ام محمد .. خلاص ياابو تركي ماالومك وسامحني ياتاج راسي ، وتعال نشرب الشاهي مع الخاله .. صبيت للخاله الشاهي وقلتلها شوفي حبيبتي وانتي كده بتشربي الشاهي كملي الحكاية ..
قالت : آآه يافطوم انتي تعرفي خالتك ماتحب تتكلم ولا تصرخ على احد ، عشان كده صارت هي الكل بالكل في البيت وتعاملني معامله طيبه قدام محمد ولما يخرج ، تصب عليا غضبها وانا اخاف اقول ل محمد عشان محمد يحبها ومابدي اكون سبب في تفريقهم ..
في الليل يخرجو يسهروا ويقفلو عليا الباب ، واكون جيعانه وعطشانه اروح المطبخ بس ماالاقي شيء والثلاجة مقفوله ، سلمت امري الى الله ونمت وقلت في نفسي خلاص لازم اقول لمحمد يرجعني الحاره ، انا تعبانه كثير ، لكن الصباح رباح ..
صحيت من النوم وجلست انتظر محمد يخلص فطوره عشان اقله اني رايحه حارتي .. وفعلاً خلص محمد من فطوره وكان خارج زهمته وقلتله اني بدي اروح الحاره ، لكن يافطوووم ماخلصت كلامي مع محمد إلا وخرجت من الغرفه رافعه خشمها للسما ووقفت ويدها على وسطها وقالت : انا موقلتلك يامحمد اني عازمة صاحباتي كلهم وانهم يبغو طبيخ امك ؟؟؟؟

وفجأه دق الباب وكان محمد يبغا امه تروح البيت .. الله يعطينا الصبر حتى ترجع ..

.