من الذاكـــرة الجزء ..13..

مرحبا انتهت العشره الأولى من شهر رمضان المبارك ودخلنافي العشره الثانية وايضاً قربت على الأنتهاء ..الله يبلغنا العشر الأواخر من رمضان ويعتق رقابنا من النار ...
******************************
صحيت من النوم على صوت في الحاره وضجة كبيره .. ارسلت تركي وقلتله روح شوف ايش فيه وتعال بسرعه ..
رجع بعد شويه يلهث من الجري الله يسامحني انا قلتله روح بسرعه .. المهم خلينا نشوف ايش يقول ؟؟
تركي : تصدقي ياامي انه خاله سعاد جايبه فرش جديد في بيتها عشان العيد الله ياامي على فرش مررره حلو ..
انا طبعاً لبست عبايتي ورحت بيت خديجة ، وقلتلها سمعتي الى انا سمعته قالت لا قلتلها خليكي نايمة ومنتي داريه عن شيء شوفي سعاد جددت فرش بيتها ، قالت ياشيخة قولي كلام غير هذا مو معقول طيب عيشة تدري ؟ وبس عيشه عرفت وقالت ل رقية ، ورقية قالت ل زينب ، وزينب قالت ل جميله ..
وعملنا مؤتمر وكانت النتيجة انه كل وحده تروح تزعل في بيت اهلها وماترجع إلا على فرش جديد !!
سمعت ام محمد بالخبر وجاتني عند اهلي وقالتلي ليه يافطوووم عملتي كده خربتي معظم بيوت الحاره الله يسامحك اشبه فرش بيتك زي الفل يجنن ... شوفي فطوم لازم تصلحي الي خربتيه ..
****: طيب خالتي لكن مدام انك جيتي خلاص كملي الحكايه ..
@ : طيب فطوم .. بعد ماسمعت الكلام الي جرحني قدام الضيوف من مرة محمد ، دخلت الغرفه ودمعتي على خدي وجلست افكر في بيتي وحارتي وجيراني ، بس لقيت نفسي عمان اجمع حاجاتي وبشويش خرجت من غير مااحد يحس بيا ومشيت على رجولي داك المشوار الطويل الين ماوصلت للحاره وفتحت بابي ودخلت ماتصدقي يافطوم لو قلتلك ان روحي رجعتلي .. بعدين حطيت راسي ونمت نومه هنيه في بيتي ..
**** : طيب ياخاله محمد ماسأل عنك معقوله ؟؟
@ : هي طبعاً لما فتحت باب الغرفه وماحصلتني بدأ الخوف عندها وماهي عارفه ايش تقول ل محمد .. وطبعاً لما رجع من سهرته جاء عند باب غرفتي عشان يطمن عليا.

لكن جات هي بسرعه وقفت عند الباب وقالت لا يامحمد امك قالت لحد يزعجني بدي انام وطبعاً بعد ماعشيتها ..
محمد : انا كثير اعزك لأنك تعز امي وتخدميها ربي ما يحرمني منك يارب
ودخل نام وفي الصباح فطر وراح شغله ، لكن لما رجع من عمله استغرب ليه باب غرفة امه مقفول الين دحين وفينها مايشوفها في البيت ولا يسمع حتى صوتها ..
وطبعاً سأل مرته ردت عليه وقالت ااه نسيت اقلك ان امك قالت جيرانها وحشوها وراحت تشوفهم وبعد يومين ترجع تاني وقالت كمان قولي لمحمد لا يقلق عليا انا بخير وسلمي عليه .

....