من الذاكـــرة .. الجزء ..16..

مبروك عليكم العشر الأواخر من الشهر المبارك وربي يبلغنا ليلة القدر يارب
رجعت البيت بعد مارحنا وشفنا العروسة طبعاً.. لكن ماقلت لأبو تركي انه محمد جاي ياخذه معاه عشان الخطوبه ، لأني انخرست من الي شفته ، ابو تركي راح وجاء ابو تركي تاني ، واكيد بتقولو خير اش فيه !!
اقلكم اشفيه ، قبل اخرج من بيتي كان شعر ابوتركي مابين الأبيض والأسود ، صار شعره بني لامع وكان بشنب ولحية ، لكن صار وجهه انظف من وجه تركي ،، صار هو العريس ماهو محمد المسكين ، المهم دق الباب وراح تركي وفتح الباب وكان طبعاً العريس محمد على الباب ،، وراح يجري تركي يزهم ابوه ، وبس ماشفت غير ابو تركي خارج من الغرفة يتمختر ، قلت الله واكبر عليك ياشيخ حتى يوم فرحي ماكنت زي كده معقوله الحرمة التانيه تسوي كده في الرجال ياويلي لا تروح ساره تختار ابو تركي .
ودخل وسلم على محمد وطبعاً محمد قال لأبو تركي على الخبر السعيد وطلب منه مرافقته عشان يخطبها ،
انا طبعاً واقفه ورا الباب مو عشان اتصنت لا عشان اشوف ابو تركي وهو خارج من الغرفه بعد سماع الخبر ، وجات عينه في عيني اكييييد كان يتمنى الأرض تنشق وتبلعه ، وقلي بصوت مخنوق انا رايح مع محمد لبيت الجيران يبغاني في موضوع خاص !

على مين ياابو تركي تلعبها نسيت اني اناكمان ام تركي .. خليته خرج من هنا وانا كمان خرجت وراه ورحت لجارتنا زينب وقلتلها ابغاكي دحين ترجعي فطوووم بنت ١٤ سنة وصرخت فيها تقدري ولالا قالت إلا ، واشتغلت فيا شغل عند الله خبره وبس خرجت من عندها مااعرف نفسي حتى ليلى لمن شافتني قالت اتفضلي دحين امي تجي قلتلها انا امك ياهبله ، واخذتني ب الأحضان ..
وبعد ساعات رجع ابو تركي وراسه في الأرض مرخيه ولكن لما شافني قال لليلى ليه ماقلتي انه عندنا ضيوف ردت ليلى لا دي امي ولكن مارد بس دخل ايده في جيبه وطلع علبه صغيره فتحها وطلع منها خاتم جميل واخذ ايدي ولبسني خاتم الخطوبه للمره التانيه ... قلت في نفسي يامصيبتي لا يكون شايفني ساره !!

لكن ماسألتُ نفسكم وانتم عمان تتابعوا معايا كيف جاء الخاتم في جيبه بهذه السرعه شااايفين كان متعشم خير في ساره وراح اشترى الخاتم وحلق شنبه ودقنه وصبغ شعره باقصى سرعه وانا نشف ريقي وانا اقلو ياابو تركي قصر لحيتك شويه يقوم يقلي تبغيني يافطوم اخالف السنه ..