من الذاكـــرة الجزء..3..

البيوت اسرار ومليانة حكايات خلف الأسوار ..
في كل مره ازور فيها ام محمد اسمع مثل جميل منها ، لكن الأمثال الي تقولها خالتي ام محمد توجع في القلب ياريت اقدر ادخل جوة قلبها خليني احاول ، على فكره من يوم ماعرفت ام محمد وانا بطلت اشرب شاهي في بيتي ..
رحت لبيتها ودقيت الباب زي العاده وقامت تفتح وهي تقول استني يابنت ( اتملت العدوة وقلت المروه ) الظاهر جيت في وقت غير مناسب لأنها كانت تتعشا ، وفتحت الباب وقالت في وجهي (مطبق العاده ومعصوب كل يوم ) صدقوني ماقدرت امسك نفسي من الضحك وقلت كمان تقوليها في وجهي ياخالة ... قالت ادخلي ياشيخة وبلاشي كتر كلام عند الباب .
طيب خالتي جلست وهذا فنجاني حق الشاهي من يد مانعدمها يارب .. لكن خالتي دي صورة محمد الي على الجدر معلقه ؟
قالت : ايوه هذا محمد
قلت : طيب فينه مااشوفه
قالت : كيف تشوفيه إذا انا امه ومااشوفه
قلت : الله يخليكي ياخالتي حكيني طيب على الأقل اشيل معاكِ شويه
قالت : لما مات ابو محمد ماترك لنا ولا ريال واحد في البيت ، ومحمد صغير في الأبتدائي يدرس ، حبيبي كان محتاج مصروف للمدرسة لكن من فين اجبله ياحسره العين بصيره واليد قصيره ..
قلت : طيب من فين تعيشو ياخاله ؟
قالت : كنت اخلي محمد يروح المدرسة ، وانا اخرج من بعده اروح بيوت الجيران واسألهم ان عندهم غسيل وسخ اغسلهم هوا بسرعة قبل محمد مايرجع من المدرسة ..
قلت : طيب كم يعطوكي على هذا الغسيل كله
قالت : اللي فيه النصيب المهم شيء يسد الرمق .. بس مو هنا المشكله يابنتي !
** اجل ياخالتي ايش الي حصل اكيد بطلو منك وشافو وحده غيرك تغسلهم
صرخت في وجهي وقالت ( انتي كده دايماً تسرقي الكبابه من وسط القدر ) انفجعت منها واخذت عبايتي وخرجت وانا اقولها جاء وقت السحور اجيلك بكره ياخالتي ...
قالت ياهنا مين يعيش .. مع السلامة