من الذاكـــرة الجزء ..14..
مساء الخير اليوم جاني تركي وجايبلي معاه خبرين واحد فرحني والتاني زعلني
الخبر الأول : يقول ان ام محمد عازمتنا الليله نسهر عندها ، فرحت وقلت اخيراً يافطووووم راح تذوقي اكلها ...
اما الخبر التاني : شافني تركي فرحانه راح قايلي انتِ ياامي طول عمرك مستعجله ، قلت ليه ياتركي ؟ اتكلم بسرعه طيحت قلبي في رجولي .. قال : الخالة تقول بس كل وحده فيكم تجيب صحن معاها من طبيخها عشان هي تعبانه مافيها تسوي شيء .. لا والي اسوء من كده خرج ابو تركي من الغرفه وقال فطوووم لا تنسي تجيبي معاكي شيء نتسحر بيه من عند ام محمد ، كان متعشم ياقلبي يلا عشم ابليس في الجنة ...
ورحت انا والجيران وكانت سهره حلوه .. بس انا قلت لأم محمد تكمل الحكايه عشان مافي وقت العيد قرب
**********************************
المهم قالت ام محمد : مضت ايام ومحمد لا حس ولا خبر ، وصار عقلي يودي ويجيب وصرت قلقانه عليه ،
قلت في نفسي معقوله محمد قلبه قاسي لهذه الدرجة .. وصرت مريضة وطريحة فراش والجيران الله يسعدهم يارب قامو بواجبي وماتركوني لحظه .
لكن زوج خديجة ماقدر يسكت اكتر من كده وراح لمحمد وقله انه امه مريضه وتبغا تشوفه . محمد حبيبي انفجع وخاف عليا ولما جاني وشاف حالتي ، انكفى على رجولي وهو يبكي ويقول سامحيني ياامي ماكنت ادري عنك لكن منها لله الي كانت السبب وصرخ وهو يبكي وقال ( امي الحرمة دي طالق طالق طالق ) انا صرت ابكي واقله لا يامحمد حرام عليك ليه عملت كده ، لكن محمد مارد عليا ، وراح بدل ملابسه ولبس ملابسه القديمه الي عندي من اول ، ودخل المطبخ وطبخلي الشيء الي يعرفه ونظف البيت ، وراح لبيوت الجيران يسلم عليهم ..
والله يا فطووووم ، شميت ريحة العافيه ونور بيتي برجعة محمد لكن معقوله يجلس محمد كده طول عمره من غير زوجة ؟؟
***: قلتلها لا ياخاله محمد ماراح يبقى من غير زوجة
@ : قالت ايش تقصدي يافطوووم
قلتلها ولا شيء ياخاله لكن طولي بالك انتي شويه بس ... ونتقابل بكره بإذن الله ..
وخرجت من عندها وسمعتها تقول ( الخبر اليوم بفلوس بكره يصير ببلاش )



تعليقات
إرسال تعليق