من الذاكرة الجزء 15 بقلمي

خرجت من عند أم عارف وانا ماأشوف طريقي , من عمايل حماتي وتدخلها في حياتي ..ولما وصلنا البيت راحت تجري ليلى على غرفتها وقفلت الباب عليها بالمفتاح ..
لكن انا من كثر قلبي مومقطع على ليلى قلت لازم اتكلم مع حماتي , وأخليها تصرف نظر عن ولد سالم ..
لكن حماتي راسها يابس وعنيدة , ولما شافت ابو تركي داخل علينا سوت نفسها تبكي وتقول آآآه ياراسي جيبي حبوب الضغط يامنيره وبسرعة قبل يصير فيا شيء ..
ابو تركي انفجع وجلس تحت رجولها وقلها اشبك ياأمي من أيش تعبتي لايكون آكل ام عارف ماناسبك ؟؟
قالت لا حرام الحرمة أحتارت ايش تسوي عشان ترضينا , لكن فطوم ماتحترمني يارائد وطولت لسانها عليّ , حتى بنتك قوية زي أمها .. لكن لو سمعت كلامي واتزوجت بنت أختي ماكان صار هذا كله ..
قال ابو تركي ياأمي ايش جاب الكلام هذا دحين بعد 18 سنة تقولي ياريت , وانتي يافطوم ليه زعلتي أمّي ؟؟
صرخت حماتي وقالت بس هو ذا ليه يافطوم زعلتي أمّي بدل ماتعطيها كف على وجهها وتعقلها ...
ياجماعة والله عصبت وأنا أكتب هذى الحلقة حسيت بالظلم يعني لو ضربني ابو تركي ايش يستفيد لأني راح اطبق الدنيا عليه وعلى إلي ......... بس بلاش اكمل لأني مؤدبة ...
المهم قلت أسمع ياابوتركي " أم عارف طلبت يد بنتنا ليلى لولدها عارف , وبس وماكملت كلامي قاطعني ابو تركي وقال والله نعم الناس الطيبين والنعم بعارف ...
صرخت حماتي وقالت مستحيل البنت مالها غير ولد عمها وأخوك منتظر جوابك , إيش قلت يارائد ؟؟
ابو تركي قال طيب ياأمي لازم نسأل البنت اول هي موافقة على ولد عمها ولالا ؟؟
انا صرخت بصوتي عشان أفرح ليلى وقلت " ينصر دينك ياأبوتركي "
بس ولاثانية وحده إلا وأم رائد راحت في أغماء وماندري هو اغماء سكر ولا ضغط ولا تمثيل الله أعلم ....