حكايات حجازية من الذاكرة ....بقلمي
دخل ابو تركي غرفته وكان زعلان مني ..انا تركته ومارضيت حتى اعتذر عن عملتي السودة ..
وقلت في نفسي خلاص يافطوم لاتسوي غير رز وعدس واليوم الجو مغيم ويمكن تحط مطر يعني مافي احسن من العدس في هذا اليوم ..
وانا ماشية ورايحة على المطبخ بالصدفة سمعت حماتي تقول لبنتها ( شوفي يامنيره دحين غرفة ليلى خلاص فاضية .. ايش رأيك نعيش فيها ونجلس على قلب فطوم .. وبيتنا خلاص نأجره ويصير عندنا دخل تاني ) فرحت منيره وقالت والله ياامي فكرة , خصوصاً انا اكره فطوم أبغا العمى ولاابغاها !!
انا سويت نفسي اني ماسمعت ولاشيء ورحت سويت الرز والعدس ...وبعدين رحت زهمت ابوتركي وكان زعلان لكن كلمتين حلوين خلت ابو تركي ينسى نفسه وجلس يضحك بصوت عالي
طبعا حماتي ماعجبها وقالت شوفي يامنيره فطوم قاصدة تسوي كدا مع رائد عشان تقلنا (إن كان هذا يغيظكم انا ازيدكم ) وقلبت وجهها في ابو تركي بس هو كمان سلم على راسها ومشي الحال ..
حطيت سفرة الآكل وغرفت وجبت تبسي الرز والعدس وسلطة الحمر والمخلل والله سفرة تجنن
صرخت حماتي وقالت : ايش هذا يافطوم ماتعرفي انه هذا الرز يسويلي نفخة في القولون ..قلتلها ياحماتي والله كثرت الكمون لاتخافي ..
قامت من فوق السفرة وقالت جيبي عبايتي يامنيرة ....انا ماسكت قلتلها خير ياحماتي أنتِ راح تاخذي صنعتي آخذه عبايتك ورايحه فين ..
قالت اروح بيت ليلى يمكن الاقي عندها احسن من اكلك ...ابوتركي حط ايده على راسه وقال ياامي البنت مالها يومين في بيت زوجها .. واذا اكل فطوم ماعجبك اروح اجبلك اكل دحين ...
قالت هي ماتحب آكل السوق ...
انا فكرت اني اغير موضوع الأكل وقلت لأبوتركي : ايش رأيك نسوي غرفة ليلى مجلس للحريم
طبعا حماتي طالعت في بنتها وفنجلت عيونها .. وقالت شوفي يامنيرة العيشة كيف حلوة وسط العيلة واللمة ...
ابوتركي قلها وعلى نياتو المسكين : طيب ياامي ايش رأيكم تعيشو معانا هنا , قالت والله انك ابن حلال دوبي قلت لأختك نعيش في غرفة ليلى ...
ابوتركي طالع فيا وسكت يمكن فهم شيء والله اعلم ....
تعليقات
إرسال تعليق