حكايات حجازية من الذاكرة ...بقلمي
حياكم الله الأصدقاء والمتابعين
عدنا مجدداً مع حكايات حجازية من الذاكرة ..بقلمي
اللي تابعوا معانا العام الماضي ..كنا اتوقفنا بعد ليلى مااتزوجت وخرجت من البيت
نشوف حال فطوم بعد فراقها كيف ^_^
*****************************************************
خرجت ليلى من البيت على بيت زوجها وهذا شيء طبيعي ..بس انا ماني قادرة اتحمل بعدها عني مع انه لسانها طويل وعويلة وطول النهارقدام التلفزيون ماتتحرك .. لكن كانت مسوية حركة في البيت ..
المهم تاني يوم من الفرح كان البيت مقلوب وحالة مايعلم بيها غير ربنا ..صحيت حماتي من النوم وقالت : مو المفروض اليوم نروح نتغدى عند ام عارف ..قلتلها خير ان شاءالله ياحماتي لسى البنت مالها يوم وليلة تبغينا نروح نتغدى عندهم ..
قالت اصلا انتِ ايش فهمك في العادات يافطوم نسيتي انه لازم اليوم يكون صبحة بيت العريس !!
قلتلها الله يخليكي ياحماتي انسي الموضوع احنا ماندري عن ظروف الناس ..وانا جسمي مكسر من التعب خلينا في بيتنا دحين ادخل المطبخ واطبخلك ...قالت طيب بس ارسلي تركي يجيب أقة لحمة من الجزار وسوي ندي احمر ...قلت حااااضر ياحماتي ...
وراح تركي وجاب أقة لحمة ..ولما جيت اطبخ وفتحت كيس اللحمة , اتفاجأت وفنجلت عيوني مومعقول دي لحمة ..زهمت تركي وقلتله ايش هذا ياتركي فين اللحمة هذا كله شحم ابيض ..
حط يده على راسه وقال صحيح ياامي افتكرت انا سألت الجزار ليش اللحمة بيضة كده ؟؟؟
ايوه وايش قال ياتركي ... قال ياامي انه الخروف أشقر ...
انا ماقدرت اتحمل أخذت عبايتي , ورحت عند الجزار ورميت اللحمة في وجهه وصرخت عليه وصوتي سمعوه كل اهل الحارة ..شوية كده حسيت احد يشدني من عبايتي وكان ابو تركي وقلي فضحتينا يافطوم فين اودي وجهي من اهل الحارة ..الله يسامحك ياشيخة ..
طبعا حماتي سمعت القصة كلها قالت لولدها كان شلت كف واعطيتها ...بس انا سمعتها قالت كده عليت صوتي عليها وقلتلها مو انتي الي طلبتي الندي حق اللحمة ... الله يرحم ديك الايام لما كنا لحالنا انا وابوتركي كنا نمشي بأي حاجة ناكلها ونحمد ربنا ...صرخ ابو تركي وقال ارحموني ياناس ودخل غرفة النوم وقفل عليه الباب .....
تعليقات
إرسال تعليق