حكايات حجازية من الذاكرة ..بقلمي
في الليل شافني ابوتركي وانا رايحة انام في غرفة تركي ...
قام جاء ومسكني وقال : لايافطوم ارجعي غرفتنا ولاتحرقي قلبي !
*** مايصير يا حبيبي الغرفة صارت حقت ياسمين ..
__ لا تقولي كدا يافطوم مستحيل أحد ينام على فراشك غيرك
*** طيب فين تنام يارائد ..!
__ ماادري انا تعبان يافطوم ..الله يسامحك ياامي هي السبب
*** ليش تلوم حماتي مو انت اللي جريت ورحتلها برجولك ..لوكنت تعزني من قلبك ماكان هان عليك ان احد ياخذ مكاني عندك ..
__ أقسم لكِ يافطوم . ان مستحيل احد ياخذ مكانك , ارجوكِ ارحميني
*** خلاص حبيبي : خليها تجي عادي .. وانا مش بعيدة عنك حتى ملابسي بخليها في دولابي , عشان ماتحس ببعدي عنك ..
وقبل مايتكلم ابوتركي سمعنا الدق على الباب ...وراح تركي يفتح لكن الدهشة خلته يتلجم
وجاني يلهث ..
*** اشبك ياواد : مين اللي جاء ؟
___ بنت الحلاق ياامي جات
*** طيب حبيبي وسع كدا وخليني ادخلها ..لكن ابوك فين ياتركي ؟
__ ابويا راح غرفتي وقفل على نفسه
انا جمدت قلبي ورحت دخلتها ورحبت بيها ..وصارت تسألني مين حضرتك وقبل مااجاوب ..ردت حماتي وقالت : حضرتها تصير مرة ولدي الغالية ام تركي
وقبل لايكثر الكلام اخذتها , ووريتها غرفتي ..اقصد غرفتها مؤقتا ...ومااحد يسألني ليش مؤقتاً ...
زهمت ابو تركي ... حبيبي مكسوف وعينه في الأرض ...دخلته غرفتي ورديت عليهم الباب ....
دخلت غرفة تركي وقلت في نفسي جاء الوقت اللي تدلعي فيه يافطوم ...وصرت انام الين الظهر وماادري عن بيت ولاطبيخ .....يجي ابوتركي من العمل جيعان مافي أكل ..يجلس يصرخ ويقول اربعة حريم في البيت ومافي وحدة تطبخ ...
قامت الست ياسمين وقالت خلاص حبيبي لاتهز بدنك دحين في دقايق يكون الأكل جاهز عبال تغير هدومك ...
فرح الشمولول وراح وبدل ملابسة ..وجاء وجلس قدام التلفزيون مبسوط في انتظار المندي يخرج من الحفرة ...آلهي يحفروا ...... استغفرالله
بعد شوية جاء الأكل وجاني تركي يقلي هيا ياامي قلتله روح ياواد انا صايمة
سما بالرحمن ابوتركي وأكل اول لقمة ..انشرق المسكين من كثر الملح ..اللحمة ماهي مستوية ..الرز شايط
الأكل في حالة ....جاني على غرفة تركي وقلي كله منك يافطوم وخرج معصب .. وياسمين علا صوتها وقالت انت ماعندك غير فطوم وراحت غرفتي غضبانة وتقول طلقني يارائد ...قلتلها جاك الموت ياتارك الصلاة ..
انا أخذت عبايتي , ورحت للمقينة جارتي خديجة , وقلتلها : شوفي ياعيني ابغاكِ
تخليني قمرالزمان ..تعرفيها اللي في التلفزيون ...
وبس رجعت البيت ..ولقيت ابوتركي عمان يسأل عني زي المجنون ....
ولما شافني اتجنن اكثر وقال ياحبي لاتغيبي عن عيني ..لكن كيف انعمت عيني وماشفت هذا الجمال من زمان ....
وسحبني من يدي وقلي تعالي نروح غرفتنا ..انا سحبت يدي وقلتله : حبيبي فيها ياسمين
لكن المسكين فقد اعصابه وقال ... ياسمين انتِ طااااااالق ..
تعليقات
إرسال تعليق