حكايات حجازية من الذاكرة ...بقلمي

ابو تركي مايدري انه حماتي وبنتها مخططين على غرفة ليلى .. قام وخرج من غرفة المعيشة , وقلي يافطوم الحقيني بكاسة موية على غرفتي ...
اعطيته الموية لكن رزع الكاسة على الارض وقلي انا شاكك في كلام امي وحاسس انها عمان ترسم على حاجة ...
قلتله صح ياخويا كل الي في بالك صح ...قال طيب يافطوم كيف يسيبو بيتهم الكبير ويعيشوا هنا في وحدة غرفة .... انا درت وجهي وقلت بشويش قالوها في الامثال ..الدار دار ابونا والغرب يضايقونا ...
ابوتركي قال ايش عمان تقولي يافطوم ..قلتله سلامتك ياابوتركي , بس انا قلت مومشكله برضها دي امك واختك ومالهم غيرك ...قلي شفتي لوحلفتي انك قلتي كدا برضي مااصدقك أعرفك يافطوم .. بس انا سمعت رائد يقلي هذا الكلام ..تركته ورحت ادور عبايتي وخليه يشبع بالبيت هو واهله
شافتني منيره ادور عبايتي قالت لاتتعبي نفسك انا رميتها في الغسالة مع العبي حقتنا ..
انا اترفع ضغطي و صرخت على منيرة ..لكن تركي حبيبي جاني وقلي لاتزعلي ياامي دحين اروح اجبلك عباية من ام محمد عشان تلبسيها وتروحي عندها .. انا مسكت تركي من شعره وشديته وقلتله انا ناقصة عشان تطلع انت كمان في وجهي ...
بعد شوية ضرب جرس الباب وراح تركي يفتح الباب ..وجاني يجري قلتله اشبك لايكون حرامي واقف على الباب ...قلي ياامي ارخي صوتك فضحتينا هذا عارف يقول يبغاكِ ...
سلمت على عارف وقلتله ليه جيت لوحدك فين ليلى لايكون البنت صرلها شيء ياعيني عليكِ ياليلى مالحقتي تفرحي ....خرجت حماتي من الغرفة على صوتي وقالت استني يافطوم ..دائما كدا تسرقي الكبابة من القدر ....خلينا نشوف ايش يبغا عارف ....
قال عارف امي تقول بكرة كلكم تجو الغدا عندنا عشان غلقت ليلى اسبوع من الزواج ومسوين عزيمة لها ...
قالت منيره بس انا ماعندي شيء البسه ياامي خلينا نروح السوق دحين عشان اشتري فستان ...
قالت حماتي وليش المصاريف الزايدة ادخلي على دولاب فطوم وخذي منه الفستان الي يعجبك وكلها بفلوس ولدنا ....