حكايات حجازية من الذاكرة...بقلمي

وصلنا بيت ام عارف وكان مليان حريم عزمت جيران الحارة كلها .. وكانت مسوية استعدادات كبيرة ..عشان ماسوينا فرح لليلى بسبب مشاكل حماتي ...
بعد شوية دخلت ليلى المجلس وهي تقول للقمر قوم وانا اجلس بدالك ربي يحميها ... لكن الزين عمره مايكمل ... واكيد راح تسألوني ايش صار دوبها البنت دخلت ..
طيب راح اقلكم , طبعا كلكم عارفين ان ليلى لسانها متبري منها طويل ويبغاله قص ..
اول مادخلت تسلم علينا قالت : مو هذا فستانك الاحمر اللي عمتي منيرة لابسته ؟؟ انا شديتها وجلستها جنبي وقلتلها يابنت الهبلة لاتفضحينا ...
رجعت وقالت ليه جدتي قاعدة عندكم الين دحين وماراحو بيتهم ....وبعدين رفعت صوتها وقالت ليه لابسة كدا ياامي ؟ فين فستانك حق العيد كان لبستيه ...
انا خلاص راح تنفجر مرارتي , البنت جوزناها لكن الطبع يغلب ..حسبي الله ونعم الوكيل ..قومي من جنبي ياليلى ...
ونحن جالسين الضيوف تبارك الله عمان يقدفوا وبعد شوية دخلت وحدة لفتت انظار الكل , جمال وطول وشياكة سبحان الي خلقها ..
بعد شوية سمعت حماتي تقول لبنتها , شوفي يامنيره , كيف الطول عز مو زي جماعة الي في بالي
ياحسرتي عليك ياولدي ظلمناك لما زوجناك من اللي ماتسمى ....
انا طبعا احترمت نفسي ورحت جنب ام محمد , وكنت خلاص ماني قادره استحمل بس هدت عليا ام محمد ...
ام عارف بعد ساعة تقريبا قالت يلا ياجماعة الآكل لايبرد ... وجلسنا على السفرة ليلى جات وجلست جنبنا .. وطبعا ليلى نعته في اكلها زي العادة , لما جات تاكل بالغلط جاء بصل في فمها طبعا مااستحملت وقامت بسرعه من فوق السفرة وطبعا عارفين الباقي ..
حماتي بصوتها قالت اشبها ليلى يافطوم قلتلها ..بس ماصدقتني وقالت ليه تبغي تخبي علينا احنا اهلها وقامت عند ام عارف تباركلها .. ام عارف استغربت وقالت معقول ليلى وعارف دسوا عننا خبر زي هذا , وانقلبت الدنيا على راس ليلى وعارف .....
حسبي الله عليكي ياحماتي البنت ماكملت حتى اسبوع .......