حكايات حجازية من الذاكرة ...بقلمي
دخلت البيت ورحت ادور على ابو تركي لاكن مالقيته ..بصراحة دمي فاير
مالحقت افرح ببيتي ..ترجع منيرة وحماتي ومعاهم مهند كمان ..هذا حرام والله
خلاص سلمت امري الى الله وقمت ونظفت البيت وطبخت وبعدين عبيت السفرة
وجاء ابوتركي ومعاه عليه حلوة في يده , وقلي غمضي عينك فطوم ...
ولبسني اسورة ذهب تجنن , واتغدينا وبعدين قلتله على شغلة مهند ...
__ والله يافطوم لو فعلا باع بيتهم وجاب لمنيرة الذهب راح ترضى بيه وبسرعه كمان
وربنا يعيننا عليهم
تعرفي فطوم وانا ماشي من جنب دكان الحلاق لقيت الصبيان عمان ينظفُ الدكان ولما سألتهم ! قالو عم سعيد راجع دكانه وبيته ..زهق من الحارة التانية
*** طيب وبنته وزوجها
__ ماادري يافطوم ..
بعد شوية دق الباب وراح ابوتركي يفتح : وبعدين زهمني ورحت اشوفه
__ فطوم هذا الصبي حق خالة عيشة ام ابراهيم يقول مسوية عزومة وعازمة اهل الحارة كلهم ..
*** طيب متى ياابوتركي
__ بكره بعد اذان الظهر
ورحنا العزومة طبعا انا لبست فستاني الأحمر اللي حرمتني منه منيرة
وجميع نسوان الحارة حضروا ..
وجات مرة ابراهيم ورافعه خشمها في السماء , حتى اني خفت على راسها لايصقع في السقف ... ليلى صارت تضحك وتقول حرام عليكِ ياامي ..
وبعد شوية جات وأخذت بنة ليلى وصارت تدلعها ..وانا نفسي اخنقها ..
مسكينة ياامي عارف يقلي حياتها مع ابراهيم عذاب بسبب غيرته ..يخرج يقفل عليها الباب والطاقة سمرها عشان ماتشوف احد ..وبطلها الكعب العالي ..
*** انا قلت من زمان هذا ابراهيم واحد مفتري
وفي شيء تاني ياامي بس امانة تحلفي انك ماتقولي لأحد
__ انطقي يابنة الهبلة تحلفي امك كمان
*** طيب تعرف زهور بنت الفران ياامي
__ اعرفها بنت زي القمر بس اشبها لاتقولي انها انخطبت كمان
*** إلا ياامي سمعنا ان في هرجة صارت
__ بس مين سعيد الحظ ياليلى
*** والله ياامي خايفة اقلك
__ اتكلمي يابنت الفار صار يلعب في عبي
*** لااطمني ياامي
__ طيب قولي بسرعه
*** ابراهيم هو اللي خطبها
__ ابو عين زايغة ...والطويلة اهم شيء لايطلقها حرام الطلاق
وضحكت ليلى وعرفت اني خايفة لا ترجع لأبوتركي ...لكن سألتها كيف عرفت كل هذه الأخبار عن جارالهنا اللي مشيب الحارة ..قالت
*** ليش انا ماقلتلك ياامي مين سكن جنبنا
__ لا ماقلتي ياستي
*** شفتي البيت اللي جنبنا سكنت فيه وحدة خياطة وكل اهل الحارة صاروعندها يخيطوا وبلمره كمان تجيب اخبار اهل الحارة من الزباين ...وهي اللي قالت على بنت الفران ..
__ طيب ايش اسمها يمكن اكون اعرفها من اول
*** أسمها ( ريحانة ) ياامي ....
تعليقات
إرسال تعليق