حكايات حجازية من الذاكرة ...بقلمي

رجعنا من العزومة وتركنا بيت ام عارف مقلوب من عملة حماتي .. قال ابو تركي ايش فيه يافطوم ماني شايفكم مبسوطين صار شيء هناك ....
قلتله انا تعبانة ورايحة انام عندك حماتي اسألها ...دخلت غرفتي وجلست افكر في ليلى المسكينة كيف راح تخارج نفسها ..بعدين فكرت شوية وقلت لنفسي انا اتعب نفسي ليه دي لو كان في وحده تانية زيها كان خربو بلد ...خليها تنقي شوكها بايدها ...حطيت راسي على مخدتي ومادريت عن نفسي إلا تاني يوم , صحيت على صوت حماتي وهي تقول لأبو تركي الهانم حقتك الين دحين نايمة
لايكون تفكر اننا راح نخدمها .. انا خرجت من غرفتي اتمطع وادلع وقلت صباح الخير ياحماتي
ردت حماتي بصوت قوي وقالت : بدري يافطوم أرجعي وكملي نومك ..قلتلها لاياحماتي مومعقول اخليكم تشتغلو وانا نايمة ...بعدين قلت ياربي ليه دائما أقول لرائد ابو تركي انا لازم اتغير ..
وبس قلت حبيبي فطرت ...
طبعا حماتي ماعجبها وقالت لولدها روح الحق شغلك اتأخرت ..لكن ابوتركي لما سمع كلمة حبيبي بطل في الشغل وقال لحماتي انه عنده اجازة اليوم ... وأخذني من يدي وقال تعالي يافطوم نسوي الفطور ...( الظاهر كلمة حبيبي سرها باتع ) وكان اجمل يوم في حياتي ...واسوأ يوم في تاريخ حماتي ...
المهم جلسنا نفطر وصار ابوتركي يأكلني بيده ويتغزل فيا ..انا جات عيني في عين حماتي شفت الشر طالع منها حتى جسمي قشعر وقلت ياساتر ربي يكفيني شرك ياحماتي ..
صبت الشاهي حماتي واعطت رائد وبعدين قالت : الله يارائد لما كنا عند ام عارف دخلت وحده من المعازيم قمر تجنن ايش الطول وايش البياض والشعر الحرير والكعب العالي ..ايش اوصفلك وايش اخلي بس ....
طبعا ابوتركي طار عقله من الوصف بس ...وقال فين دي البنت يعني من الحارة ولالا
قالت حماتي : شفت الحلاق الي في آخر الشارع .هي هناك جنبه ...
انا مارضيت اتكلم وقررت اعلان الحرب عليهم كلهم ..لكن بالسياسة بس اجيب طولة بال من فين وابو تركي اتلحس عقله ..لازم اروح اشتري كعب عالي وعباية جديدة ...ابوتركي سمع اني رايحة اشتري كعب عالي ..جلس يضحك وقال طيب يافطوم أنتِ صدقتي اني انبهرت من وصف امي للبنت ..
قلت الله يطمن قلبك حبيبي ...
لكن كلنا الظاهر عمان نضحك على بعض .. وحماتي شغلتها دحين انها تخرب بيتي ...