حكايات حجازية من الذاكرة ..بقلمي
بصراحة ياجماعة من يوم حماتي ماوصفت البنت لأبو تركي , وانا صار الفار يلعب في عبي ...
صارت الساعة أثنين في الظهر وأبو تركي مارجع البيت ...وانا عيوني نشفت من كثر ماني جالسة في الروشان أستني ابو تركي ...جات حماتي وقالت : أبو تركي رجال مو ولد صغير عشان تقلقي عليه كدا ..! وشمقت بعيونها فيا وهي رايحة ..
بعد شوية سمعت الباب انفتح ودخل ابوتركي ومعاه علبة جزمة , وقال خذي قيسي يافطوم تجي قدك ....
انا قلت يعني انت ياابوتركي مقتنع أني فعلاً قصيرة ..ولا تبغا تشمت الأعادي فينا ..
ضحكت حماتي وقالت : إشلك بالطول الصناعي ..روح خذ الطول الطبيعي من أهله
أعتقد محد يلومني لو رحت عند أم محمد ومارجعت .. وفعلا أخذت عبايتي وفتحت الباب وجيت بخرج لكن ابو تركي مسكني وسلم على راسي وقلي سامحيني يانور عيوني ..
انا الهبلة لما سمعت الكلام المعسول على طول فسخت عبايتي وأخذت الجزمة ورحت غرفتي ...
وانا رايحة سمعت حماتي تقول : يا مأمن الرجال يا مأمن الموية ف الغربال ..
انا هنا وقفت مع نفسي وقلت ايش قصدها حماتي ياترى تعرف شيء انا مااعرفه ..
ولا عندها نية تخرب بيتي ...على العموم بكرة الموية تكذب الغطاس ...
بعد مااتغدينا وشربنا الشاهي ...قام ابوتركي وراح غرفته وهو ساكت وسرحان
الرجال صار يحب يجلس لوحده وكأنه عمان يخطط لشيء ..!
أنا ماهان عليا اشوفه بالحالة دي ..وقلتله خير ياابوتركي : ليش منتَ على بعضك
__ لافطوم انا عادي لاتشغلي بالك بس بدي اروح احلق ..تبغي شيء اجيب معايا ..
*** لااا ماابغا شيء بس عند آية حلاق رايح
__ ومن متى يافطوم تسألي عن الحلاقين كمان
*** لا تزعل بس سمعت ان الحلاق إللي في نهاية الشارع أيده ثقيلة
__ طيب ايش رأيك يافطوم ان هو دا الحلاق اللي رايح عنده ..وبطلي تسألي فين رايح ومتى راجع ..انا مو تركي عندك ......
**************************************
شاااافين خلاص ابو تركي أتغير وصار أعمى قلب وبصيره والبركة في حماتي
تعليقات
إرسال تعليق