من الذاكرة الجزء 9 بقلمي

من العادات القديمة في مكة انو بعض العوائل .. بعد الأسبوع الأول يبدأو كل يوم يفطرو عند ناس ..وكل بيت يسوي طبخة او صينية حلا وتتكون سفرة كبيرة والكل يتجمع عليها وبعد الفطور تحلا الجلسة بس طبعاً مافي حش في احد عشان رمضان وبعد رمضان ربنا يستر ( ترجع ريما لعادتها القديمة )
قالت ام محمد اليوم الفطور عند أم عارف ..بس جلست محتاره ماني عارفة ايش اسوي آكله طيبة آخذها معايا .. رحت سألت ليلى وقلتلها تعرفي تسوي حلا طعم من كتابك حق المدرسة ؟
ردت ام لسان طويل وقالت مولازم تاخذي شيء معاكي وخلينا نشوف أم الي مايتسما ايش راح تطبخلنا ..
بصراحة انا ماني عارفة البنت دي طالعة لمين لما قلت لأبو تركي انها طالعة لعماتها زعل مني ..
المهم جاء ابو تركي ومعاه صينية كبيرة من الكنافة الي يحبها قلبكم ..
بس من فرحتي قلتلو الله يرح قلبك زي ماريحت قلبي ... ياعيني ابو تركي مو مصدق اني عمان ادعيلو لكن المثل يقول ( يامأمنه على الرجال ...يامأمنه على الموية في الغربال ) المثل واضح وابوتركي اكبر مثل قدامكم
المهم رحنا بيت ام عارف وشفنا اهل الحاره كلهم هناك وأنبسطت ليلى مع البنات ..
قرب المغرب وضرب مدفع الفطور وقلنا بسم الله اللهم لك صمنا وعلى رزقك أفطرنا ..
قالت ليلى اشبها الموية كذا حاره ماني عارفة اشرب , انا ماني عارفة ارد عليها ام عارف جالسة قدامي وعمان ترحب بينا
رجعت ليلى وقالت انا مابدي افطر قلتلها ليه قالت انا متعودة على آكلك وبس ..قلتلها عيب ومايصير .. قالت شوفي السلطة ملحها قليل واللقيمات ليش مو مقرمشة ومافيها شيرة ...والسنبوسك فيه بيض مسلوق انا مااحب البيض في السنبوسك ..
انا ماقدرت اتحمل حطيت يدي على فمها وكتمت نفسها خجلتني قدام الجارات ..لكن حسيت ان ام عارف أذنها معانا وكانت تشوف كل شيء ضحكت وقالت ياجماعة ترى كل هذا الأكل من الجارات الله يعطيهم العافية ..
قمت من فوق السفرة وسحبت ليلى من يدها ورحت البيت ورميت العباية على الأرض ومسكة ليلى من شعرها وهي تصرخ .... جاء ابو تركي من العزيمة وشاف بنته تنضرب قال والله ماشفت وحدة قوية زيك يافطوم ..
انا لما سمعت ابو تركي يقول عني كذا اخذت عبايتي وخرجت وقلت منك لله ياابو تركي ......