من الذاكرة الجزء 12 بقلمي

خرجت من بيت ام عارف وانا بحسرتي وقاعدة اتخيل طول الطريق صوت البناجر في يدي اوصوت الرشرش ..وانا سارحة في الخيال الجميل حسيت بشيء شد عبايتي وكنت راح أطيح على وجهي ..وايقت جنبي لقيت المجنونة حقتي ليلى عشان تبغا تكلمني , قلتلها ياعفشة ماتعرفي تتكلمي إلا كذا ..قالت الله يعينك ياأمّي على جدتي دخلت المطبخ وشافت الدنيا مقلوبة , وقالت الله يعينك ياولدي كيف قادر تصبر عليها ..
__ هاا وايش قال ابوكي بعدين
** قال ابوية معليش ياأمي انا السبب في هذا كله فطوم مالها ذنب
__ وايش ردت عليه
** قالت شايفة يامنيرة كيف فطوم لحست عقل رائد , يشوف الغلط قدام عيونه ويقول انا السبب
__ وانتي ياشاطرة ليش مارفعتي المطبخ في غيابي بس فالحة تنتشي العباية وتجيبها عشان اخرج
** ياسلام ياأمّي هذا جزاتي الي بدي اعملك قيمة عند ابوية
__ يعني انتِ دحين شايفة ان ابوكي مو شايفلي قيمة .. منك لله ياليلى الله يبلغني لما اشوفك مشحططة بعبايتك كل يوم من بيت لبيت ..
اعوذ بالله من الشيطان الرجيم , الله يخزيك ياشيطان وعلى قول المثل ادعي على ولدي وأكره الي يقول آمين ..
وصلنا البيت ودقيت على الباب وقبل ماينفتح الباب سمعت ام تركي تقول ياساتر مين على الباب قالت ليلى , انا ياجدتي افتحي الباب أمّي جات معايا ..ردت وقالت الله لاكان جاب الغلا ولا كياله ..
وبعدين فتحت وقالت أهلا يافطوم اشوف الدنيا انعكست بدل أنتِ ماتستقبليني انا استقبلك , المهم السحور قرب يافطوم وانا ماني شايفة لا طبيخ ولانفيخ ايش راح نتسحر ..
قالت ليلى نتسحر نواشف من البيت
صرخت في وشها جدتها وقالت يابنت العويلة عمرك شفتي احد يتسحر نواشف
قالت ليلى ايوه شفت البارح في المسلسل السوري اتسحرو زيت وزعتر وجبنة وابريق شاهي ..
قالت جدتها ابريق ياليلى , قالت ليلى اقصد براد ياجدتي
بعدين قالت ام رائد لرائد عاجبك كلام بنتك ومرتك .. قال مافي شيء ياأمُي نمشّي وحده ليلة ..
صرخت وقالت شايفة يامنيرة نجيب اولاد ونربي ونتعب وتجي الأجنبية تاخذه بارد مبرد وتغسل مخه ..
انا طبعا ساكته ماقلت شيء مطمنة عندي الي يرد عني .. ردت ليلى على جدتها وقالت : طيب أمّي كمان اهلها ربوها وتعبو عليها وبعدين جيتو واخذتوها بارد مبرد ..
ابو تركي قال فطوم خذي بنتك وروحي من وجهي عشان لا أرتكب فيكم جريمة ..
وبس مالحقت اروح غرفتي إلا وسمعنا أذان الفجر ... وصرخت ام تركي وقالت انا عندي سكر كيف اصوم . قالت منيره انا عندي فقر دم حاد كيف اصوم من غير سحور .. قال ابو تركي انا من المغرب مااكلت اخاف يصرلي شيء
انا قلت حسبي الله ونعم الوكيل .. خلاص تعالو نجلس عند الراديو نسمع فتاوي رمضان يمكن نلاقي حل عند الشيخ ..