من الذاكرة الجزء 14 بقلمي

بعد ما كتمت انفاس ليلى وكانت راح تموت في يدي .. قالت حماتي بس هذا الي شاطره فيه ضرب البنت كل شوية أنتي أصلا الرحمة منزوعة من قلبك يافطوم , بنت على وش زواج تنضرب ... قدامي ياشيخة خلينا نخرج قوام من ضيقة الخلق الي جينا فيها ...
قالت منيره قلتلك ياأمّي خلينا نروح عند بيت اخوية سالم قلتي لا أولاد رائد وحشوني ..
دحين الكلام كله صار واحنا واقفين عند باب الشارع , أجل لما نخرج ونمشي في الحاره ايش راح يصير .. بعدين اتذكرت العسكري ليلى معانا ماراح نقدر نتكلم ..
المهم وصلنا بيت ام عارف ودقينا على الباب , وقبل الباب

 ماينفتح كانت ليلى كشفت عن وجهها , انا طبعا على طول ضربتها على قلبها وقلتلها غطي وجهك الين ندخل يامصقوعة ..
بعدين جات ام عارف ورحبت بينا ودخلنا ..طبعا حماتي ماتقدر تفضل ساكته بس الحمدلله كان كلامها في صالح ليلى , لكن من داري ايش المستخبي ..
قالت حماتي ياعمري على بيتهم يفتح فلة القلب , طبعا انفشخ فم ليلى وبانت صفوف اللولو ..
قالت منيره شوفي ياأمي كيف فراشهم مررره حلو كثير ام عارف مزوقة ..
قرب المغرب أنفرشت السفرة وطبعا ليلى شافت ورق العنب انحط في السفرة قالت ليلى مو هذا ورق العنب حقنا , قالت حماتي حقكم من فين من يوم جيناكم ماشفنا طبيخ امك .. انا طبعا مسكت أذن ليلى وقلتلها شفتي كيف جبتيلي الكلام , أنكتمي شوية وارحميني ياشيخة ...
أذن المغرب وفطرنا وشربنا الشاهي .. بعدين قالت ام عارف أنتِ عارفة يافطوم احنا وأنتم زي الأهل يعني عادي لو اتكلمت وأنتم في بيتي ..!
قلت خير ياام عارف شغلتيني قولي ايش في ؟؟
قالت خير ان شاءالله , بس طالبين يد ليلى لعارف وهذا ولدكم وانتم عارفينه
انا طبعا مالحقت اتكلم ردت حماتي وقالت : لاياحبيبتي بنت ولدي مايخذها إلا ولد عمها سالم ..
طبعا ليلى وأنا اتفاجأنا وقالت ليلى مستحيل اتزوج ولد عمي ..
ردت حماتي وقالت بس يابنت ماعندنا بنات تتشرط ولد عمك اولى بيكِ .....