من الذاكرة الجزء 10 بقلمي

بعد المشكلة الي سوتهاليلى في بيت ام عارف , وبعد الضرب الي أكلته مني كانت النتيجة طبعا خروجي من البيت , وعلى بيت ام محمد ويااااااريت مارحت عند ام محمد لكن قالوها زمان كلمة ياريت ماتعمر بيت ..!دقيت على باب ا م محمد وفتحتلي الباب وقالت خير يافطوم دوبنا كنا مع بعض عند ام عارف لاتقولي اني وحشتك يافطوم
انا ماقلت انك وحشتيني لكن شفتي ليلى ايش سوت عند ام عارف ..
سكتت شوية ام محمد وبعدين قالت الله يعينك عليها يافطوم ويعين الي راح ياخذها , بس لاتكوني ضربتيها ترى يافطوم البنت كبرت وبالراحة عليها ..
قلتلها لا ماضربتها بس شديت شعرها ..
قالت الله يجمل حالك يافطوم اجل جيتي عندي زعلانة ياأهلاً وسهلاً ..
تعالي شوفي ايش جاب محمد ..
قلتلها ايش هذا ياام محمد ؟
قالت هذه قوالب تحطي العجينة فيها وتحطي جوتها اللحمة المفرومة وتقفلي القالب بالضغط عليه وتقطعي العجينة الزايدة من بره وبعدين تفتحية تطلع حبة السنبوسك تجنن وكلها متساوية ..
بصراحة عجبتني الفكرة وزي العادة جاء تركي وأخذني ورحنا البيت , وتاني يوم عجنت العجينة وسويت السنبوسك بيدي ونسيت اعملها في القالب وماافتكرت إلا قبل المغرب بنص ساعة ..
دخل ابو تركي المطبخ وشاف القالب على الدولاب قام قلي ايش هذا يافطوم قلتله بالقصة كلها ....وزي ماقلنا انه كلمة ياريت ماتعمر بيت واقصد من كلامي انه ياريت رفعت القالب جوة الدولاب عشان ابو تركي يدخل نفسه في كل شيء ...
المهم قلي والله يافطوم مررره القالب جميل ويطلع السنبوسك متساوي قلتلو ان شاءالله بكرة من بدري اسويلك السنبوسك في القالب ..
لكن ابو تركي ماعجبه كلامي وقلي فطوم الآن تفكي كل السنبوسك الي سويتيه وتعيديه مره تانية في القالب ..!
قلتلو حرام عليك المغرب قرب يأذن , قال يأذن بفلوسه ومحد لو علينا فكي العجينة بسرعة ..
انا صرخت بصوتي وقلتلو تخرج ولاا خرج انا من البيت .. رد وقال فطوم ( باب البيت يقول لباب السطوح " الي يجي يجي والي يروح يرووووووووووح"
كسر خاطري ولقيت ليلى واقفة تعطيني العباية نتشتها منها بقوة وقلتلها ادخلي ياشملولة كملي القلي ..
وخرجت ملطشة ماني عارفة فين اروح طفشت من ام محمد بدي اغير شوية ورحت عند ام عارف ...!