من الذاكرة الجزء 11 بقلمي

خرجت من البيت ودموعي على خدي وجلست افكر طيب لو رحت عند ام محمد , تجلس تقلي امثال وترجعني تاني , خلاص خليني اشكل شوية اشوف ام عارف ..
وصلت عند بيتها ودقيت الباب وبعد شوية حتى فتحت الباب قلتلها ساعة تخليني واقفة بره ؟
انفجعت الحرمة مني مسكينة واعتذرت .. ودخلتني وبعد شوية قالت الله جابك يافطوم عمان الف ورق عنب ومستنية احد بس يجي ويفزعلي فيه قربي يافطوم ولفي معايا ..
انا قلت في نفسي طيب كان تسألني وتقلي اشبك يافطوم ولا خير يافطوم ولا ايش الي جابك في هذه الساعة ..
لكن الحرمة
اتمسكنت الين اتمكنت وحطتني امام الأمر الواقع وخلتني الف ورق العنب ..
بعد ساعة دق بابها وقالت اروح اشوف يمكن عارف جاء وجاب خالته معاه اصلها جايه تجلس عندي يومين ..
وفتحت الباب لكن اولادي هما الي جو تركي وليلى , انا استغربت ايش جاب ليلى ..
دي ليلى هي الي دايما تخربها وتقعد على تلها ودحين جايه ترجعني قلت يلا تسوي خير ولو مره في حياتها ..
قال تركي زي العادة ابوية يقول بسرعة ارجعي البيت وهو متأسف على كل شيء ..
لكن ليلى مسكت يدي بقوة وقالت اصحك ترجعي ياأمّي بكل سهولة ..!
قلتلها ايش تقصدي يعني , قالت على الأقل اطلبي تعويض ويجبلك بناجر ذهب او يجبلك حزام ذهب او يجبلك رشرش ذهب , عشان يعرف قيمتك ومره تانية يخاف يزعلك ..
ام عارف قالت يابنت خليكي محضر خير تبغي تخربي بيت أمك ؟
ردت ليلى وقالت والله ياخالتي أبوية لازم يعرف قيمة أمي ويقدرها ..
على العموم ياخالة ام عارف خلي أمي عندك الين أبوية يجبلها الذهب ويراضيها ..
وخرجت ليلى وهي فارده عضلاتها لدرجة حسيت تركي هو البنت وليلى هي الولد ..
بعدين مرت ساعة او اثنين ورجع تركي يدق على الباب بسرعة فتحت ام عارف ودخلته , قلتله خير جاب ابوك الذهب ؟ قال لا بس عندنا ضيوف في البيت ..
قلتله مين عندنا اتكلم بسرعة ..
قال جدتي وعمتي منيره , وابوية حكاهم بكل شيء , قامت جدتي وقالت أخسرك منها والله لأزوجك ست ستها ..
قلت شايفة ياأم عارف كيف ابو تركي وأهلو ..
قالت أسمحيلي يافطوم مو منك من بنتك القوية الي حشت دماغك بكلام فاضي ..
وبعد شوية كمان جات ليلى عشان تاخذني , قلتلها خلاص جايه ياهبله والي تمشي وراكي اهبل منك ..
وجينا خارجين جاء عارف بالصدفة وفتح الباب وطبعا شاف ليلى قدامه الولد اتجمد في مكانه .. وانا سحبت الهبله بنتي وخرجت الطم على وجهي من الي راح اشوفه في البيت ....