من الذاكرة الجزء (2) قصص حجازية عن يوميات ابوتركي وفطوووم
مرت سنة في لمح البصر سبحان الله وجاء رمضان التاني ربي يعيننا على صيامه وقيامهُ ويتقبل منا ومنكم صالح الأعمال ..
هذه الأيام كثير مشغولة في تنظيف البيت وترتيبه وحالة استنفار كاملة عندنا ومقاضي رمضان جابها ابو تركي كلها منشحة في ارض المطبخ ماني عارفة ايش اسوي في عمري , حتى الخروف جابه ابو تركي كامل مو مقطع والدقيق وحب الشربة والأبزار وعلب الكاستر وشراب التوت وعلب الجلي والسقدانة وقمر الدين , ودقيق الحب والدقيق الأبيض
لكن بصراحة احس في شيء ناقص كمان ماجابه ابو تركي , بس خليه يمكن اتذكر بعدين ..
جاء ابو تركي للمطبخ وقال سيبي كل شيء من يدك وقومي سوي لنا لقمة نأكلها ..
انا بصراحة تعبانة وصرخت على ليلى اناديها لكن البنت عند التلفزيون تبغا تشوف برامج رمضان ...
المهم جاني ابو تركي وقلي ابغاكي يافطوم في هرجة تعالي , قلت يعني منت شايف بعينك الدنيا حايسة خلاص اتكلم وانا اشتغل ..
قال نسيت اقلك أنه أمي جايه تصوم عندنا كم يوم هي واختي وبعدين يكملو بقية الشهر في بيت اخوية سالم ..
قلت في عيوني ياخوية بس ماعندنا غير غرفة نوم وحدة وغرفة تركي وليلى وصالون صغير مره ..
صرخ في وجهي وقال : تروحي تنامي مع بنتك وولدك واتركي غرفة النوم لأمي واختي وانا انام في الصالون ..
قلت طيب ليه مايروحو عند بيت اخوك سالم , بيته كبير وامك واختك يحبو مرته اكثر مني ..
سكت شوية وبعدين قال فطوم .. قلت نعم يابوتركي
قال: الباب يفوت جمل ..
أنا سمعت الكلام هذا تركت الجمل بما حمل , وأخذت عبايتي وخرجت من البيت ودموعي تصب ومالقيت قدامي غير بيت ام محمد , دقيت عليها الباب ولما فتحتلي الباب ..قالت خير يافطوم احد منكم صرله شيء ؟؟
قلت لا بس ان شاء الله ماضايقتكم بجيتي هذه ..
قالت ام محمد ياشيخة ادخلي أذا ماشالتك الأرض تشيلك عيوني ..
تعليقات
إرسال تعليق