من الذاكرة الجزء (2) الحلقة _4_

زي العادة مالحقت اجلس عند ام محمد وإلا جاء تركي وقال أبويه يقلك هو متأسف خلاص وارجعي بسرعة اللحمة مرمية في الارض لاتخرب او تاكلها البسة ..
بصراحة انا مارضيت ارجع قلت لتركي قل لأبوك ماارجع إلا لما تجمع رجال الحاره , بعدين ارجعله
قالت ام محمد : اقول يافطوم قومي ارجعي بيتك وعلى قول المثل ( حرة صبرت في بيتها عمرت )
ورجعت البيت وانا مقهورة ورميت عبايتي على وجه ليلى الي طول الوقت قاعدة قدام التلفزيون , بس آكل ومرعه وقلة صنعه
ودخلت المطبخ ارفع المقاضي وخلصت وبدأت اسوي الفطور ..
اول شيء سويته رميت الشربة على النار وبعدين عجنت العجينة وسويت السنبوسك وبخرت الزمزم , وبخرت الفول
وعبينا السفرة .. وابو تركي جالس جنب السفرة يشوف ويعد الاصناف وكل شوية يقول بس هذا الي طبختيه
لكن سبحان الله رمضان رزقه وسيع كل شوية باب الشارع يدق وتقدف صحون الأكل من الجيران ..
ابو تركي ياكل ويقول شوفي يافطوم الطبيخ كيف حق الجيران اتعلمي منهم
بس انا ساكته ومتحمله بس قلت ياليلى جيبي عبايتي .. ليلى مسكينة خافت اخرج من البيت .. هي مو خافت عشاني لا خافت يفوتها برامج التلفزيون لو قامت واشتغلت بدالي , لأنها تجلس على التلفزيون الين المذيع يستأذن عشان ينام وهي تجلس الين يرجع الارسال تاني .. سلمت على راسي وحزنت عليها لكن ابو تركي سمعني اهرج بشويش قلي ارفعي صوتك يافطوم ..
قلت لاسلامتك ياخوية بس على قولة المثل ( آكل وآتكى وقال ريحة آكلكم مستكا ) ...