من الذاكرة الجزء (2) الحلقة _5_ بقلمي

دائماً الجلسة في رمضان حلاوتها بعد المغرب , بعد وجبة الفطور تتلم العيلة كلها في مكان واحد قدام التلفزيون , قدام بسطة الشاهي الي ريحته توصل لأخر البيت طبعا بالنعناع والحبك ...كان الشيء الجميل في التلفزيون بعد المغرب برنامج على مائدة الأفطار ( للشيخ علي الطنطاوي ) الله يرحمه
سبحان الله الصغير والكبير يجلس يتفرج على الطنطاوي , شخصية عجيبة تجذب كل المشاهدين لجمال وروعة كلامه والأبتسامة الحلوة دايما تشوفها على وجهه حتى وهو في اصعب الظروف ..
المهم خلص الطنطاوي وقلت يلا ياليلى المطبخ حايس خلينا نخلصه وبعدين نرجع نشوف برامج التلفزيون , وبس ماقلت شيء تاني , ماشفت غير ليلى تصرخ في وجهي وتقول ياسلام اروح المطبخ شوفي كم برنامج وتمثيلية تفوتني ..
صرت اصرخ عليها وهي ترد عليا الين صوتنا وصل الشارع ..بعد شوية دقت الباب ام محمد وقالت خير اشبكم صوتكم طالع الين الشارع ؟؟
المهم حكيتها بكل شيء ردت وقالت والله يافطوم بنتك طالعة قوية بس ماادري لمين !!
والحمدلله انها ماكملتها وقالت ذاك المثل المعروف كان اعلنت الحرب ضدها ...
بعدين قالت : ليش يافطوم ماتجيبي صبي يساعدك في شغل البيت ..
قلتلها جبت ياحبيبتي لكن أخذه تركي معاه الحاره يلعب كوره ..
ضحكت ام محمد بقوة وقالت طيب اسمعي يافطوم .. في بنت ضعيفة ويتيمة تجي كذه قد ليلى ايش رأيك تكسب أجر فيها ومنها تساعدك في شغل البيت ..!
سكتت فطوم شوية وبعدين قالت طيب جيبيها بكره معاكي ...