من الذاكرة الجزء 8 بقلمي

من يوم ماجابت ام محمد البنت اليتيمة وابو تركي اتغير حالو كان لما يدخل البيت يبدل ملابسة ويلبس حق البيت دحين صار يجلس في البيت بملابس الخروج ..وكان يصلي التراويح كلها دحين صار يصلي نصها ...وكان يروح القهوة يتابع الحكواتي دحين بطل ولما سألته قال : والله يافطوم صارت الحكايات مملة
صارت الجلسة في البيت بملك الدنيا , ياشيخة الواحد مافي زي بيته , وكان شعره ابيض واسود صار شعره بني لامع وحلق دقنه وشنبه وصار في سن تركي ..
ماادري ايش اسوي ارتكب جريمة لكن افكر في البنت اليتيمة .. المهم بعد السحور راحت البنت مع ليلى تنام , وبعد اطمنت رحت انا كمان ونمت لكن جاني ذاك الحلم في المنام ربي يجعله خير , شفت وانا نايمة أنو ابو تركي صار يشخط فيا ويقول حرام عليكِ يامفترية تتعبي البنت في الشغل اعتبريها زي بنتك العويلة ليلى ...
وبعدين جاب المأذون وعقد عليها وصارت البنت قوية وتقلي شوفي يافطوم هنا في البيت هذا راسي براسك مافي احد احسن من احد ..
ظلمت الدنيا في عيوني وصرخت بصوتي ومسكة المخدة وصرت اضرب بيها ابوتركي واتملت الغرفة كلها ريش حق المخدة ..
صحي ابوتركي مفجوع من نومه وقال اشبك يافطوم .. قلتلو انا فين قال انتِ هنا في غرفتك , قلتلو ومين معانا قال : ريش النعام قلت ايش جابها لغرفتي ..قال اصحي يافطوم انا اقصد ريش المخدة حسبي الله عليهم نشتريها على انها ريش نعام طلعت ريش دجاج ..
قلت الحمدلله كان حلم وقمت ولبست العباية ورحت صحيت البنت من نومها واخذتها عشان اردها لأم محمد ..
رفعت راسها ليلى وقالت حرام عليكِ ياأمي , قلتلها أسكتي ونامي نامت عليكِ حيطة ..
سلمت البنت لأم محمد وارتحت بس ام محمد قالت فطوم عبي نفسك ترى الأسبوع الأول من رمضان خلص يعني من بكرة لازم نفطر كل يوم في بيت وأول بيت معزومين فيه بيت ام عارف ...