حكايات حجازية من الذاكرة ...بقلمي
انا ماقدرت أستني أخذت عبايتي ورحت عند ريحانة وقلتلها : أحلفي على المصحف أن الكلام اللي قالته ياسمين صح ...لكن ريحانة زعلت مني وقالت ماكنت اتصور انك تقولي عني كذابة ....
*** الله يخزي ابليس سامحيني ياختي
__ خلاص فطوم انسي الموضوع وشوفي مين راح يجي بعد شوية
*** مين قولي شوقتيني اعرف
__ افتحلها الباب وارجعلك
*** ماشاءالله مين القمر دي ياريحانة
__ دي زهور بنت الفران
*** مسكينة ياسمين كيف لما تشوفها ..بس الزين مايكمل فين طول ياسمين
__ حرام عليكِ يافطوم البنت ضعيفة
*** لاماهي ضعيفة جمالها يشفعلها ..لكن .....
__ لكن ايش يافطوم ايش عمان يدور في راسك
*** اسمعي ريحانة ياسمين لها خياطة عندك
__ لها قطعتين لسه ماجات أخذتها
*** طيب متى راح تجي عندك
__ اليوم بعد صلاة المغرب
*** طيب ارجعلك بعد المغرب
بعدين جابت الشاهي ريحانة ..وجلست اتكلم مع زهور وقلتلها كيف ترضي تاخذي واحد متزوج ..
قالت : ابراهيم خطبني من قبل ياسمين ...لكن ابويا ماوافق عشان يبغاني اسكن لوحدي مو مع امه ..
بس يازهور خالة عيشة طيبة وتحب الكل ...قالت ادري بس انا ابغا اكون لوحدي ..
*** طيب وافق ابراهيم ..!
__ طبعا وافق اصلاً بيننا علاقة حب من زمان
*** يعني في رأيك هو مايحب ياسمين .. دا يموت فيها ويخاف عليها من الهوا الطاير ..وفين راح تسكني
__ ابراهيم قال انه في واحد في الحارة يبغا يبيع بيته لأنه محتاج شوية فلوس
*** سمعتي ياريحانه عن عمايل ابراهيم . اقنع المسكين مهند يبيع البيت عشان حضرته هو يتزوج فيه ..
شوفي يازهور إذا أنتِ فعلا تحبي ابراهيم تسكني مع حماتك ..وانسي موضوع البيت
__ ليش طيب بس احنا اتفقنا خلاص
*** وانا مايهمني ياحبيبتي اتفاقكم ..المهم مهند مايترك بيته ويجلس على قلبي
وخرجت زهور من عند ريحانة ودموعها على خدها الجميل ...قالت ريحانة لية بس كدا يافطوم , حرقتِ قلب البنت وكسرتِ خاطرها ...
*** لايكون قلبك ضعيف ياريحانة ... انا قلت وحده بوحده والبادي اظلم
__ تقصدي مين بكلامك يافطوم ؟
*** لاتشغلي بالك هو يعرف نفسه .....
تعليقات
إرسال تعليق