سفرة حماتي

 

الله الله على بيتنا اليوم فيه ريحة الزمن الجميل , عشان حماتي هي اللي طبخت أخذت سيارة أجرة , وراحت أشترت جميع لوازم الطبخ .. وإحنا نايمين , وفي المغرب حطت ديك السُفرة اللي تشهي القلب وتسر العين ....

لكن قالوها في الأمثال ( زوجك على ماعودتيه وأبنك على ماربيته ) جلسنا وسمينا بالله ..

ومد يده ابو تركي في طبق الفول المبخر , وقال معليش ياامي البصل يعملي نفخة وريحة الفحم ظاهرة في الفول .. طيب خذ اشرب شربة .. قال أنا اتعودت على الشربة المصفاية مااحب اشوف حبوب القمح قدامي .. طيب خذ سنبوسك , قال مااحب البيض فيها ..

طيب الكنافة تجنن , بالمكسرات والتانية بالجبنة .. قال أنا متعود عليها بالموز بس

قالت : طيب خذ ذوق اللقيمات .. قال أخاف أثقل على الصلاة ياامي ..

بصراحة زعلت حماتي , ومعاها حق تزعل , أنا لو تركي عمل كدا فيا أغضب عليه وأحرمه من الميراث ...

خرج ابو تركي , واكيد راح ياكل بليلة عند البسطة ,,,,

أنا قلت : ولايهمك حماتي دحين أعزم الجيران على هذا الأكل الطيب ..فرحت وقالت طيب ..

زهمت على سماح .. قالت عندي صديقاتي مااقدر أجي ...

حماتي قالت خليها تجي هي وصديقاتها ... وياريتها ماجات ........