" كبسة "
كبسة تعني عندنا في المنطقة الغربية , الرز البخاري .. وله عدة طرق في طبخه , المهم أشتهى ابو تركي السحور يكون رز بخاري ..وكان يبغا حماتي هي اللي تطبخه ...
انا فرحت وجلست قدام التلفزيون وجبت قهوتي ..ابو تركي راح القهوة ....
بعد شوية سمعت حماتي تنادي ..رحت عندها , قالت فين السمن قلت أحنا نطبخ بالزيت ..
قالت : حضري القدر وحطي الزيت , وقطعي البصل وغسلي اللحمة وحمريهم كلهم مع بعض ..
بعدين قالت : فين الأبازير , قلت مافي غير فلفل اسود وملح , حطت ايدها في وسطها وصرخت في وجهي , فين القرفة والخولنجان والهيل والليمون الناشف ..
قلت ماعندي ياحماتي ..
قالت : فين حريم زمان المصنعين , ياميلة بختك ياابوتركي , لو كان أخذت منيرة مو كان احسن ....
قلتلها بكل عصبية , وليه ماأخذ منيرة ست الحسن والجمال ....!
قالت خلاص الحمدالله على كل حال , على قولتهم أرضى بقردك لايجيك أقرد منه
__ هذا اللي طلع معاكِ ياحماتي الله يسامحك
*** يقطعني ان شاءالله سامحيني يافطوم
__ خلاص ياحماتي بس انا بنت ناس ماني من الشارع عشان تقولي عني كذا
*** معليش يافطوم انا زي أمك وأنتِ أم اولادنا ومرت الغالي ابو تركي , أنا خلاص ماابغا غير سعادتكم , بس كنت بدي اطبخ على اصوله ..
__ طيب ياحماتي جنب البيت العطار ابو محمد
*** هاتي عبايتي انا اروح اشتري الابازير
__ هو رجال طيب كثير بس متزوج تلاتة حريم
*** مومشكلة يافطوم الشرع حلل الأربعة
تعليقات
إرسال تعليق