فنجان قهوة

اليوم من بدايته كان جميل اجواء باردة وغيوم كثيفة ونسمة عليلة ، حبيت اعزم صديقتي سماح على فنجان قهوة ، وطبعا ماصدقت اني اعزمها في ثواني وهي عندي لكن جاتني معصبة ووجهها يقطع الخميرة من البيت على قول حماتي ، المهم لما سألتها عن الأسباب قالت : البارح قالت لها الشغالة حقتها أن بيت الجيران صار عندهم موت وصوت بكاهم واصل للشارع، تقول سماح أخذت عبايتي بسرعة ورحت قلت مايصير واجب حق الجيران ، ودخلت عندهم وسط نواح وبكاء ولطم على الخدود وتعديد ، اللي تقول مالحقت تفرح ياقلبي والتانية خسارة هذا الجمال يروح في شربة موية والثالثة تقول ياريت انا اللي رحت ولا انت .. ومعاهم البوم الصور وكل وحدة تقول للتانية شوفي كيف كان قاعد شوفي وشوفي الين قلبي اتوجع منهم قلت اشوف يااختي الألبوم وطبعا ماني شايفة احد غير قط رومي جميل ، قلت فين المرحوم ماني شافية غير هذا القط ؟ قالت امهم هو حبيبي فارس ولطمت على وجهها أنا صرخت فين فارس ماني شايفة غير قط رومي ، قالت هو فارس .. قلت يعني دحين جيت اعزي في قط ، حسبنا الله ونعم الوكيل وقمت بسرعة ورحت البيت ومسكت الخدامة وطحت فيها ضرب ، مع انها المسكينة مالها ذنب ....

صدقوني ياجماعة بعد اللي سمعته منها ضحكتي وصلت الين الشارع ، دخل ابو تركي زي المجنون يصرخ ويقول استحي يافطوم صوتك واصل للشارع .. قلت معليش ياابوتركي شر البلية مايضحك .... وراح فنجان القهوة في الرجول .